Thuawihna awmzia chu..
Ringtute leh ringlo mi te pawhin thuawihna kan pawm dan hi chu a inang tlangpui awm e. Thuawihna kan tih hian lungawi taka midang te thu zawm lam hi a kawk ber a. Bawih/Chhiahhlawhin a chhawrtu thu matheiloa a zawm lam chu a kawk lem loang.
Tu thu nge awih tur?
Naupang te chuan an nu leh pa te thu lungawi takin an zawm a tul a, zirlaite pawhin an zirtirtute thu an zawm a tul ang bawkin mi tupawh mai hian aia upa te leh roreltu te thu kan zawm a tul bawk a ni. Amaherawhchu a thu kan awih tur a kha ‘a rinawm em?’ tih leh ‘A thu awih tlak a ni em?’ tih erawh Pathian rawn chungin kan ngaihtuah tel a tul ang.
Engvanga thu awih tur nge kan nih?
Thuawihna chungchang leh a rah te chu Bible ah heng ziakah te hian chhiar tur a awm a: Mat 6:33, Mat 7:21-23, Mat 7:24-27, Luka 11:28, Ephesi 6:3, Heb 5: 8-9, Luk 22:42. Pathian thu in thuawih thatzia tam tak min hrilh avang ringawt pawhin awih mai tur kan ni tih chu Ringtute chuan kan hre theuh awm e. Amaherawhchu Pathian thuawih in ti si, chenpui hahthlak tak te, khawtlang tana hnawksak tlat te a awm theih tlat mai. Chuvangin tlem azawng han tarlan belh leh ila.
Naupan tet atanga nu leh pa te’n ‘Ti suh’ an tih tilui tlat te chuan buaina an tawk thin a. An rawn thang lian a, an ze thalo, chu thuawihlohna chu an than hnan a. Sikul lamah lah an zirtirtute zahlo pawl an ni tlangpui nghe nghe. An puitlin thlengin buaina in a umzui emaw tih tur khawpin harsatna namenlo an tawk zut reng mek a nih hi. Chuvang chuan buaina pumpelhna atan hrim hrim pawh naupanlai atangin kan nu leh pa te thuawih hi tih thanah kan neih a tul a ni.
Aia upa te hi tunlai mi te tan chuan an thil thlir dan leh ngaihdan te pawh a lo hmanlai deuh nge nge thin a. Mahse ngun taka ngaihtuah chuan thil chi hrang hrang an lo tawn buak hnem tawh avang te leh an thlir thui zawk avangin an thusawi te hi naupang zawk te hian kan ngaihdan a lo ni chiahlo a nih pawhin kan pawmluih a ngaih chang te pawh a awm ve tur a ni. An thu kan awih avanga thil pawi a lo thleng ta a nih pawhin a sual thui lutuk lemlo tlangpui, a chhan chu thil pawi thleng palh thei te pawh a pawi thui lutuk tur te chu an hriatna a zau zawk miau avangin risk min lakpui ve bawk ang. Chuvangin engmah chinchang la hre thuilo zawk te chuan a hre thui zawk te chu kan dah pawimawh zawk tur a ni.
Thu awih duhlo ta ila..
Mi thenkhat te chuan nu leh pa te, zirtirtu te, aia upa te, khawtlang leh sawrkar lama thuneitu te leh dan lekkawhtu te thu kan zawm avang hian chep ta riau leh zalen ta lo riau a inngaihna te pawh an nei thei awm e. Mahse han ngaihtuah chiang teh! Heng mi te hian an mawhphurhna zawn theuhah khuahkhirhna engemaw chen lekkawh ta lo sela, I zalen chiah ang em? A ruh no no chhuakah tiin ruk ruk, tualthah, inbumna leh inpawngnekna in kan khawvel hi a khat zawk loang maw?
A tawp nan..
Tarlan tur a tam a, a tira kan tarlan tak ang khan thupui pawimawh tak a ni a. Tihtawp dan tur pawh thiam a har viau mai. Engpawhnise, mi hlawhtling zawng zawng te hian an hlawhtlinna thuruk sawi dawn ta sela, thuawihna hi rahbi pawimawh tak a nihzia chu an sawi vekin ka ring a. Kohhran leh chhungkua-a kan mawhphurhna theuh ngaihtuah chiang ila, kan mawhphurhna hlen turin thu kan awih chiah em tih hi inngaihtuah nawn theuh ila. A pawimawh ber Vanram kaina’n Pathian thu awih theuh turin ka sawm tak meuh meuh a che u.