Science zirna mai niloin zirna peng hrang hrang te zinga a upa ber pawl, Physics hi subject zir nuam tak leh chik taka zir ngai, a ngaihtuah peih apiang te tan tuichilh theih tak a ni a. Khawvel chhung leh pawn, universe chhunga mita hmuh thamloh thil te tak te atanga lian tak thlengin, lei hnuai thuk tak atanga van thengreng thlenga eng thil pawh, thil nung emaw nunglo chungchang zirchianna ti ila a huamchin kan thelh lutuk awm lo e. Chutiang thil te chu engtia lo awm leh insiam nge an nih tih te, an chet vel dan chungchang te, a chettirtu chungchang te, an awmna hmuna nghawng an neih dan te, an chhehvela thil dang te nen an inkungkaihna chungchang leh an awm chhunzawm zel dan tur chungchang te thlenga zirna a ni, ti pawhin he Physics zirna hi a huamtir theih ang. Physics zirnaa mithiam chung chuang, a bik takin Master of Science in Physics [M.Sc. (Physics)] zir chhuak te hi Physicist tih an ni thin.
Eng vangin nge Physics kan zir ang?
Kan nitin nuna hmasawnna hrang hrang, heng: khawl lam thila hmasawnna te, inchhung bungrua tangkai tak tak te leh hnathawhna engpawh tihawlsamna atan kan bungraw hman zawng zawng hi Physics thiamna atanga hmuhchhuah leh siam chhuah a ni deuh vek mai. Chuvangin Physics thiamna hian a huapzauin eizawnna tam tak a hring chhuak a ni.
PHYSICS TUIMI TE TAN ZIR THEIH LEH HNA DIL THEIH HRANG HRANG TE
I. Bachelor of Science (Physics)
B.Sc. (Physics) zirchhuakte chuan an zir chhung zawngin Physics mai bakah interdisciplinary subject heng zingah hihan engemaw ber an zir tel a: Computer Science, Mathematics, Chemistry, Electronics, ldt. Subject dang an zir tel avang hian zir zawm theih leh hna dil theih pawh an ngah viau a. A tlangpui tarlang ila.
A. Zir zawm theih te:
1. MRNAT, IIT-JAM, JEST exam an hmachhawn thei a. Heng exam a titha te chuan India ram chhunga institution leh University tha bikah te course hrang hrang tha tak tak an zir zawm thei.
2. India ram pawna zir zawm duh te tan chuan Graduate Record Examination (GRE) an paltlang a ngai a.
3. Eng university-ah pawh Master zir zawm hrim hrim duh tan chuan a zir tumna university ah entrance paltlangin a zir zawm thei bawk.
B. Hna dil theih te: B.Sc. (Physics) graduate te tan chuan graduate atanga dil theih Sawrkar leh Private Company-a hna zawng zawng a dil theih vek a. B.Sc. (Physics) graduate leh B.Ed. zir chhuak te tan Higher Secondary School chin hnuailam zawngah Physics teachher/lecturer hna a dil theih bawk a ni. Sawrkar emaw Private Company a hnathawk duh kher lo tan pawh Mizoramah chuan Tuition class hawn ringawt pawh eizawnna tham a tling khawp mai. India ram chhunga hna dil theih tlangpui te a hnuaiah hian tarlan a ni:
1. Physics Lecturer
2. Lab Assistant
3. Research Associate
4. Subject Matter Expert
5. Technician
6. Radiologist Assistant
7. Academic Counselor
8. Content Developer
9. Quality Control Manager
10. Scientist
11. Radiation Oncologist
A chunga tarlan mai bakah hian BARC, ISRO, DRDO, VSSC, SSPL leh research centre dang changtlung tak takah te Scientist hna a dil theih bawk.
II. Master of Science (Physics)
M.Sc. (Physics) zircchhuakte chuan an Theory leh Pracctical lam an thiam tawh avangin an zir zawm theih leh hnathawh pawh a sang viau tawh a. Medical, nucleaar, private leh sawrkar lamah kawng hrang hrangin luh theihna an ngah tawh hle a ni. Zir zawm theih leh hnathawh theihh te tarlang leh ila.
A. Zir zawm theih te: M.Sc. (Physics) zir chhuakte tan chuan research centre te, university te leh institution hrang hrangah Ph.D a zir zawm theih a. Research lam tuimi te tan hriatna tihzau nan Ph.D tih theihna tlangpui tarlang ila.
1. Ph.D in Applied Physics: Applied Physics-ah chuan Physics thiammna hmanga technology tangkai tak tak siamchhuah lam an zir ber a. Physics leh Engineering zawmtu anga ngaih a ni ber.
2. Ph.D in Biophysics: Biophysics hi nunna nei tawh phawt taksa chhunga molecule insiam dan, cell chet dan leh hnathawh, thluak, thisen chet vel dan, taksa ral veng khawl chungchang leh nunna atan pawimawh dang zawng zawng zir chianna a ni ber a. Mathematics, Chemistry, Physics, Engineering, Pharmacology leh Materials Sciences lama mithiam tak tak ten an thiamna tihpunna atan Biophysics lam hi an luhchilh thin a ni.
3. Ph.D in Chemical Thermodynamics: Chemical Thermodynamics hi Chemical reaction avanga lumna chhuak/lut leh a hnathawh chungchang zir bingna lam hi a ni deuh ber.
4. Ph.D in Nuclear Physics: Nuclear Physics hi subject la naupang tak si, thang duang tak a ni a. Atom chhunga nucleus chungchang zir bingna niin peng hrang hrang a nei a, chung te chu: nuclear astrophysics, nuclear force, nuclear power, archaeological dating, fundamental symmetries, ldt. a ni. Nuclear Physics-a Ph.D nei te tan heng hmunah te hian hna tha tak tak dil theih a awm teuh a ni: Nuclear Power Plants, Aerospace Sector, Nuclear Energy Research Centres, Medical Research Labs, and Nuclear Physics Labs. Nuclear Power lamah phei chuan khawvela ram hrang hrang te an inel nasat em avangin research centre-a thawk turin a thiam bik te tan phei chuan hna sang tak tak thawh tur a tam hle a, India ram chhung mai nilo ram pawn lama hnathawhna hun remchang a inhawng zau hle a ni.
5. Ph.D in Physics: A chunga tarlan te khi Physics huamchhungah pawh subject hlawm lian bik zual te a ni a. Ph.D in Physics tih bikah hi chuan hlawm hrang hrang, heng te hi a awm: matter physics, quantum optics, laser physics, solid-state physics, materials science, electronic science, high energy physics, non-linear optics, ldt. Hemi zir zawha hna thawh theih langsar zual te chu: Physics Research Labs, Radiation Protection Centres, Oil and Gas Companies leh Energy Companies a ni.
Ph.D zir chhung hian Fellowship chi hrang hrang dil theih a tam hle a. Mizo te phei chu Scheduled Tribe kan nih avangin hamthatna kan ngah hle a ni. Fellowship hi thlatin dawn thin niin Private School Teacher te hlawh tlanglawn aiin a tam zawk tlangpui a, chhungkaw khawsak hautak lo tan phei chuan mahni inchawmna mai bakah chhungkaw tan pawh innghahna tham a tling thei hial a ni. Chuvangin chhungkaw harsatna nei te tan Ph.D zir chhunzawm hi huphurhna tur a awm lemlo a tih theih ang. Ph.D zir zawhah hian Post Doctoral a zir chhunzawm theih a. Hna dil hunah Post Doctoral tih chhunga an hun hman zah hi teaching experience atan a ziahluh theih avangin hna tha hmu lawk lo tan phei chuan Post Doctoral zir chhunzawm hi a tih chi viau a ni.
B. Hna dil theih te: Ph.D zirchhuak te tan a hnuaia hna hrang hrang te hi dil theih langsar zual tlangpui te a ni:
1. Research Analyst
2. Medical Physicist
3. Research Scientist
4. Assistant Professor
5. Laboratory Technician
6. Research Officer
7. Assistant Scientist
8. Network Administrator
9. Interface Engineer