Cryptocurrency chu Digital currency emaw Internet Pawisa blockchain technology hmanga siam kan tithei ang.
Blockchain Technology, digital ledger an tih bawk chu a awlsam zawng chuan Internet-a thil chhinchhiahna kan tithei ang. A awmzia tak kan sawi hmain kan thil chhinchhiahdan leh ziah luhdan hi sawi hmasa ta ila. Eng thil pawh kan chhianchhiah (record) dawn chuan ziakluttu (editor) an awm a entirnan Chanchinbu, History bu, Pawisa che vel adt. Hemi anih avang hian editor ten thuneihna pumhlum an nei a, chuvang chuan thu diklo leh dik tawk lo chhinchhiah a awlin Editor-in a duh dan danin alo siam danglam theih avangin a himloin a rintlak lo em em ani. Tunhma Encyclopedia te kha en ta ila World Map te kha a siamtu a zirin World Map pawh a inang lo nuk bakah Ram len zawng te chen khan a diklo ta nuaih mai ani. Kum 500 kal ta a World Map an siam mi tam zawkin kan hmuh mai theihah pawh hian Greenland ram len zawng te hi en ta ila, Africa khawmualpui tiat zeta lianin an siam avangin mi tam zawk chuan Greenland hi ram lianah kan ngaih deuh fur ka ring. Amaherawhchu atakah chuan Africa hi Greenland ram hmun 14 vel zeta lian a ni lawi si.
Ba bu (Pawisa batna bu) te hi a a batu leh battirtuin an kawl ve ve loh chuan a tuemaw zawk zawk lo rinawmlo ta se, pakhat zawkin an ziak danglam thei tihna a ni. Chutiang bawkin History bu te pawh a ziaktu leh edit tu thu thu anihna lai a awm bawk.
Blockchain Technology awmzia lo sawi dawn tawh ila. Blockchain Technology siamchhuak tur chuan thil 4 pawimawh em em a awm a:
1. Decentralized Network/ Peer to Peer Network: Decentralized network awmzia sawi dawn chuan kan nitin khawsakna a kan Pawisa hman mek Fiat currency kalphung hi sawi hmasak angai awm e. Kan Pawisa hman mek leh kan hman dan, saving ani emaw, investment emaw hi chu central Bank RBI (Reserved Bank of India) leh SEBI (Securities and Exchange Board of India) in a thunun vek a, a siamchhuah te, interest rate te, Bank leh Broker te kalphung tur leh chet vel dan tur zawng zawng hi an thunun vek ani. Hemi anih avang hian mimalin kan Pawisa chungah thuneihna pumhlum kan nei lova, Bank leh SEBI bakah BANK kaltlang lo chuan Pawisa thawn chhuah leh invest hi a theih loh a ni. Hetianga thuneitu leh enkawltu bik awmna kalphung hi Centralized Financial System (CEFI) an ti bawk. Centralized Financial System (CEFI) ah chuan thuneitu leh enkawltu bik an awm avangin thil enkawl (manage) fuh tawk lo leh eirukna (corruption) a awm duhin a eiru thei thuneitu zingah a awm theiin a awl em em bik a, chhiartu leh entu ten hemi chungchang hi chu sawi zui tur inngah viauin ka ring.
Decentralized ah thung chuan Central Bank leh enkawltu bik an awm ve tawh lova, Middleman (Bank) an awm ve tawh loh avangin thununtu bik leh enkawltu bik a awm ve thei tawh lova, chumi anih avang chuan DEFI ah chuan thiamna leh theihna neitu apiangin Cryptocurrency te, a lo dawnna tur wallet emaw, Exchange te, Insurance leh a pukna te emaw Financial system dan zawm tur awm lovin zalen takin a siam theih tihna a ni.
2. Cryptography: Cryptography chu thumal emaw data a dawngtu tur chauhin a hmuh theih tura number a lo leh (convert) kan tithei ang. Chumi awmzia chu thawntu(sender) leh lo dawngtu (receiver) chauh an awm a, a laiah data emaw message lo sawngbawl emaw lo dawngtu dang an awm theilo a ni. Thawntu (sender) chuan thumal emaw data chu a thawn chhuak a, chu a thumal thawn data chu computer program hmangin Numerical value (encrypt) ah alo chang ta a, Tala in an kalh pawh kan tithei bawk ang chu, chumi anih avang chuan middleman an awm thei tawh lova, data thawn chhuah chu lo hmu mahse a dawngtu tur lo chuan a hawnna chahbi an nei theih loh avangin a dawngtu tur chauhin a lo hawng (decrypt) thei tihna a ni.
3. Consensus Algorithm: Consensus algorithm chu kalphung fel tak computer inthlun zawmte inkara thil inthawn data inthawn a dik ngei ani tih finfiahna ani a. Blockchain technology-ah chuan Computer/Miner te hi Node an ti a (eg Node1, Node2, Node3,Node4…) Node tin te chuan blockchain inang vek emaw record inang vek copy an nei vek a. Chumi anih chuan data thar blockchain a dah lut tur chuan block thar kan mamawh tihna ani.
Entirnan, Node1 hian Bitcoin thar lo mine chhuak ta se, Block thar Blockchain ah a luh angai dawn tihna a ni a, Node tin te blockchain ah a inchhinchhiah/luh ve vek angaih avangin chutah tak chuan block thar dahluttu tur a awm theih nan Consensus algorithm hmangin Node zawng zawngah chuan block chu a in dahlut/store vek dawn tihna ani.
Consensus algorithm chi hrang hrang a awm a a lar ber Bitcoin ina a hman hi Proof of Work (PoW) a ni. PoW ah chuan block thar siam thei tur reng reng chuan Mathematical Problem an solve chhuah hmasak angai a, amaherawhchu hei hi mihringin ti lovin computer vekin a chawkchhuak dawn a ni. Chu Problem calculate thei apiang chuan Network/blockchain ah chuan block thar an add thei tihna ani a, chu chu Proof of Work kan tih chu ani.
4. Punishment & Reward: Ahmasa berin Decentralized network hmangin Computer kan thlunzawm tawh a, chu network chu Cryptography hmangin kan venghim tawh bawk a, Ceonsensus algorithm hmangin dan zawm tur a awm leh tawh bawk a. A tawp berah chuan Punishment and reward a awm leh a, a chunga kan sawi tak Mathematical problem calculate chhuaktu chuan dan (consensus algorithm) a zawm avangin lawmman (reward) Token emaw Coin a calculate dik apiangin a dawng zel dawn tihna a ni. Blockchain-a block thar siamtu/ ledger thar ziakluttu chuan lawmman atan Token emaw Coin an dawng zel tihna ni a, chu chu Bitcoin Mining kan tih thin chu ani bawk. Computer program hmang emawa Blockchain khawih danglam tum emaw Consensus algorithm zawm lo te chuan punishment an dawng ve thei a, an Token/Coin laksain an awm thei bawk.
Hemi anih avang hian Mathematical Problem solve thei tur chuan Computer chak ve pangngai tak angai a, tunlaiah phei chuan Miner an tam tawh avangin Computer a chak angai leh zual tawh ani.